اسلام آباد – 01 – مارچ (اي پي پي) صدر ڊاڪٽر عارف علوي اسپن وام اتر وزيرستان ۾ حملي جي شهيدن جي پونيئرن سان ٽيليفون تي رابطو ڪيو ۽ انهن سان دلي تعزيت ۽ همدرديءَ جو اظهار ڪيو. ايوان صدر جي پريس ونگ موجب صدر 26 فيبروري تي اتر وزيرستان ۾ شهادت ماڻيندڙ سپاهي افضل خان جي والد ۽ سپاهي عمران الله جي ڀاءُ سان فون تي تعزيت جو اظهار ڪيو. هن شهيدن کي انهن جي بهادر ۽ قوم جي لاءِ جانين جا نذرانا پيش ڪرڻ تي خراج عقيدت پيش ڪيو. صدر شهيدن جي درجن جي بلندي ۽ وارثن جي لاءِ صبر جميل جي دعا ڪئي. صدر سڄي قوم پاران شهيدن جي خاندانن جا ٿورا به مڃيا.
