اسلام آباد – 10 – آگسٽ (اي پي پي) اطلاعات ۽ نشريات واري وفاقي وزير مريم ارونگزيب چيو آهي ته عمران خان پاڪ فوج ۽ ادارن ۾ بغاوت پيدا ڪرڻ جي ڪوشش ڪئي، پي ٽي آءِ جي ٽرولرز ۽ بشريٰ بي بي جي چوڻ تي ارسلان شهيدن ۽ انهن جي فيمليز جي خلاف سوشل ميڊيا تي مهم هلائي، عمران خان جي چيف آف اسٽاف شهباز گل ان جو لکيل بيان پڙهيو، عمران خان ملڪ ۾ باهه لڳائڻ چاهي ٿو، هن پنهنجي پارٽي کي فارن ايڊيڊ پارٽي ڊڪليئر ڪرايو، اڄ سندس پارٽي مان آواز اٿي رهيا آهن ته فارن فنڊنگ ڪيڏانهن وئي، جيڪي نفرت جا ٻج عمران خان ڇٽيا، اڄ انهن کي لُڻي رهيو آهي، عمران خان جي پوري سياست نفرت، فتني، فساد، انتشار ۽ غنڊه گردي تي ٻڌل آهي، عمران خان کي 2013ع کان 2022ع تائين ايندڙ پئسي جو حساب اڃان ڏيڻو آهي. پريس ڪانفرنس کي خطاب ڪندي اطلاعات واري وفاقي وزير چيو ته اڄ هڪ شخص ٽي وي اسڪرين تي نمودار ٿيو جيڪو خوف ۽ گهٻراهٽ جو شڪار هو. هن چيو ته عمران خان پنهنجي پريس ٽاڪ ۾ چيو ته پاڪستان جي سڀ کان وڏي سياسي پارٽي کي فوج سان وڙهائڻ جي ڪوشش ڪئي پئي وڃي، سندس پارٽي کي ٽوڙڻ جي ڪوشش ڪئي پئي وڃي، هن توشه خانه ۾ ڪهڙي قسم جي خلاف ورزي نه ڪئي. اطلاعات واري وفاقي وزير چيو ته جيڪڏهن ڪير پي ٽي آءِ کي نقصان پهچائي رهيو آهي ته ان شخص جو نالو عمران خان آهي. هن چيو ته عمران خان جي چيف آف اسٽاف ۽ ترجمان سندس لکيل اسڪرپٽ اي آر وائي ٽي وي چينل تي پڙهيو، اي آر وائي سمورين صحافتي گهرجن جون ڌڄيون اڏائيندي ان کي آن ايئر ڪيو. مريم اورنگزيب چيو ته عمران خان ان لاءِ گهٻرايل هو ته سندس پارٽي جي ٽرولرز ۽ بشريٰ بي بي جي چوڻ تي ارسلان شهيدن جي خلاف مهم هلائي جن ملڪ جي لاءِ پنهنجي جانين جا نذرانا پيش ڪيا. هن چيو ته جڏهن ٽرولرز پڪڙيا ويا ته انهن چيو ته اسان عمران خان جي چوڻ تي مهم هلائي، اها مهم پاڪستانين، شهيدن جي فيملين ۽ هٿياربند فوج جي خاندانن به ڏٺي. هن چيو ته ڪو محب وطن پاڪستاني پنهنجي فوج ۽ شهيدن بابت ٽرولنگ جو سوچي به نه ٿو سگهي. مريم اورنگزيب چيو ته عمران خان جيڪي نفرت جا ٻج ڇٽيا اڄ انهن کي لُڻي رهيو آهي. هن چيو ته عمران خان جي پوري سياست نفرت، فتني، انتشار، غنڊه گردي ۽ فساد تي ٻڌل آهي. هن چيو ته پاڪ فوج سان ويڙهه عمران خان پاڻ شروع ڪئي ۽ هو پنهنجي ڀيٽ نواز شريف سان ڪري ٿو. هن چيو ته عمران خان پاڻ کي نواز شريف سان ڪيئن ملائي سگهي ٿو؟ نواز شريف ٽي ڀيرا جو چونڊيل وزيراعظم رهيو آهي، هن پنهنجو اقتدار قربان ڪيو پر آئين تي ڪڏهن ٺاهه نه ڪيو. هن چيو ته نواز شريف هن ملڪ کي جيتري ترقي ڏني عمران خان ان جو سوچي به نه ٿو سگهي. هن چيو ته نواز شريف هن ملڪ جي سلامتي، بقاءَ ۽ دفاع جي لاءِ جيڪي ڪم ڪيا پاڪستان جو ذرو ذرو ان جي گواهي ڏي ٿو. هن چيو ته نواز شريف رڳو اهو چيو هو ته ادارا آئيني حدن ۾ رهي ڪم ڪن ۽ اڄ به اسان جو اهو ئي موقف آهي پر عمران خان ادارن کي بغاوت ۽ سياسي مداخلت تي اتساهي رهي وآهي. هن چيو ته عمران خان جي چيف آف اسٽاف عمران خان جي هدايت تي جيڪو بيان ڏنو، ان حوالي سان سمورا ثبوت عوام آڏو پيش ڪيا ويندا. عمران خان جي ترجمان چيو ته لانس نائيڪ کان وٺي برگيڊيئر تائين پاڪستان تحريڪ انصاف سان ڳنڍيل آهن، جن کي پنهنجي قسم جي خلاف ورزي ڪرڻ تي اتسهايو ويو. هن چيو ته عمران خان فوج جي ڪمانڊ جا حڪم نه مڃڻ تي انهن کي اتساهيو. هن چيو ته عمران خان خيالي ميڊيا سيل پاڪستان حڪومت سان جوڙيو ۽ الزام هنيو ته هي ميڊيا سيل شهيدن جي خلاف مهم هلائي رهيو آهي. هن چيو ته اها عمران خان جي ذهنيت آهي، هو ملڪ ۾ باهه لڳائڻ چاهي ٿو، هن ادارن جي اندر بغاوت جي ڪال ڏني. اطلاعات واري وفاقي وزير چيو ته عمران خان کي معيشت تباهه ڪرڻ، ملڪ جي سگهه کي ٽوڙڻ، ملڪ جي نوجوانن کي بيروزگار ڪرڻ تي اقتدار کان جدا ڪيو ويو، جڏهن کيس اقتدار کان جدا ڪيو پئي ويو ته هن چيو ته رجيم چينج آهي، جڏهن کيس خبر پئي ته عدم اعتمادي جي رٿ ڪامياب ٿي رهي آهي ته هن سازشي خط جو سهارو ورتو. هن چيو ته عمران خان پنهنجي پارٽي کي به خراب ڪيو، ملڪ کي به خراب ڪيو ۽ هاڻي ادارن جي ساک کي خراب ڪرڻ جي ڪوشش ڪري رهيو آهي. اطلاعات واري وفاقي وزير چيو ته عمران خان فارن فنڊنگ کان وٺي پنهنجي پارٽي کي فارن ايڊيڊ پارٽي ڊڪليئر ڪرايو. هن چيو ته جڏهن فارن فنڊنگ ورتي وڃي ٿي ته پوءِ ڪمٽمنٽس به پوريون ڪيون وڃن ٿيون. اطلاعات واري وفاقي وزير چيو ته پي ٽي آءِ کي ڪنهن نقصان پهچايو آهي ته ان جو نالو عمران خان آهي، عمران خان 351 فارن ڪمپنين کان فنڊنگ ورتي، ان جي ڪري پي ٽي آءِ فارن ايڊيڊ پارٽي ڊڪليئر ٿي. عمران خان خيرات جا پئسا وٺي ذاتي استعمال ۾ آندا، هن جعلي حلفي بيان جمع ڪرايو، پنهنجي ملازمن جينالي تي پئسا گهرايا، اڄ ان جي جاچ ٿي رهي آهي ته هو خوف ۾ ورتل آهي. اطلاعات واري وفاقي وزير چيو ته نواز شريف ۽ مريم نواز شهيدن جون تصويرون لڳائي انهن کي خراج عقيدت پيش ڪندا رهيا آهن جڏهن ته عمران خان جڏهن اقتدار جي ڪرسيءَ کان محروم ٿيو ته هن شهيدن جي خلاف مهم هلرائي. هن چيو ته اڄ جيڪڏهن عمران خان کان سوال ڪيو وڃي ته هو جوابي حملو ڪري ٿو، اها سسلين مافيا ۽ گارڊ فادر جي سوچ آهي. هن چيو ته پي ٽي آءِ سان جيڪو ڪجهه عمران خان ڪيو آهي اڄ ان تي پارٽي جو هر ڪارڪن کانئس سوال ڪري ٿو ته ڇو انهن جي پارٽي کي فارن فنڊڊ پارٽي ڊڪليئر ڪرايو ويو. اطلاعات واري وفاقي وزير ان موقعي تي عمران خان جي مختلف موقعن تي ٽي وي چينل تي ٿيندڙ ڳالهه ٻولهه جا ڪلپس پڻ ميڊيا کي ڏيکاريا. هن چيو ته عمران خان قانون کان مٿانهون نه آهي. هن سوال ڪيو ته ڪهڙي جمهوريت ۾ ملڪ جي دفاع ۽ رياستي ادارن ۾ ڏار وڌا وڃن ٿا؟ ڪهڙي جمهوريت ۾ ميڊيا کي جيلن ۾ بند ۽ صحافين کي گوليون هنيون وڃن ٿين؟ ڪهڙي جمهوريت ۾ صحافين پسليون ٽوڙيون وڃن ٿيون؟ ڪهڙي جمهرويت ۾ ٿيندو آهي ته سياسي مخالفن جا هلندڙ ٽاڪ شوز بند ڪرايا وڃن؟ هن چيو ته عمران خان جي چار سالا حڪومت جي دور ۾ اهو ئي ڪجهه ٿيندو رهيو آهي. هن چيو ته اڄ عمران خان پنهنجي ڪرتوتن جي ڪري اقتدار کان محروم آهي، هن چار سالن تائين ملڪ کي ڦريو، معيشت تباهه ڪئي، پنهنجي گهر جي عورتن کان ڪرپشن ڪرائي، عمران خان توشه خانه جا تحفا وڪرو ڪيا ۽ انهن کي ڊڪليئر ان وقت ڪيو جڏهن انهن کي وڪرو ڪري ڇڏيو. هن چيو ته عمران خان ادارن ۾ ورڇ پيدا ڪرڻ چاهي ٿو. هن چيو ته ادارن جي خلاف جيڪو زهر اوڳاڇيندو ان تي زيرو ٽالرنس آهي، ان عمل کي برداشت نه ڪيو ويندو. هن چيو ته عمران خان سعودي عرب ۾ به نوجوانن کي اتساهيو جن کي 10، 10 سال جي سزا ٿي، انهن جي حوالي سان عمران خان هڪ به بيان ناهي ڏنو. هن چيو ته عمران خان ڪنهن جنازي ۾ به شرڪت نه ٿو ڪري ڇو ته کيس بشريٰ بي بي جي اجازت نه آهي. اطلاعات واري وفاقي وزير چيو ته عمران خان جو هيليڪاپٽر امپورٽيڊ فنڊ سان هلي ٿو، جيڪو فساد ۽ فتني جي لاءِ استعمال ٿي سگهي ٿو پر اهو ٻڏ سٽيلن جي مدد جي لاءِ استعمال نه ٿو ٿي سگهي. هن چيو ته عمران خان ڌرڻو هڻي سي پيڪ کي روڪڻ جي ڪوشش ڪئي جڏهن ته نواز شريف سي پيڪ شروع ڪيو، بجلي جا منصوبا مڪمل ڪيا، موٽرويز تعمير ڪيون، پاڪستان کي ترقي جي رستي تي گامزن ڪيو ۽ عمران خان جڏهن اقتدار ۾ آيو ته هن نواز شريف جي شروع ڪيل منصوبن تي پنهنجون تختيون لڳايون. هن چيو ته نواز شريف سدائين اهو ئي چيو آهي ته ادارن جي اندر موجود ماڻهو آئيني حدن کي پار ڪندا ته اهي آئين شڪن هوندا پر هن اڄ تائين ڪنهن اداري جي خلاف ڪا ڳالهه ناهي ڪئي. هن چيو ته نواز شريف پنهنجي ڪرسيءَ ۽ پنهنجو اقتدار قربان ڪيو پر آئين تي ٺاهه نه ڪيو. هن چيو ته عمران خان اڄ ادارن کي آئين شڪني جوچوي ٿو، 8 سالن کانپوءِ ممنوعه فنڊنگ ڪيس هو پڪڙيو ويو آهي، هن پنهنجي پوري پارٽي جو منهن ڪارو ڪري ڇڏيو آهي. هن چيو ته اڄ عمران خان جي پارٽي مان آواز اٿي رهيا آهن ته اها فارن فنڊنگ ڪيڏانهنوئي. هن چيو ته اڃا عمران خان کي 2013ع کان 2022ع تائين ايندڙ فنڊنگ جو حساب ڏيڻو آهي. اطلاعات واري وفاقي وزير چيو ته عمران خان جو لکيل ٽرانسڪرپٽ اي آر وائي جي انتظاميا هلائي ادارن ۾ بغاوت کي اتساهڻ جي ڪوشش ڪئي، اها اظهار راءِ جي آزادي نه آهي ۽ نه ئي اها صحافت جي آزادي آهي پر اها ملڪ دشمني آهي. هن چيو ته ان عمل کي صحافت سان ڳنڍڻ جھي ڪوشش نه ڪئي وڃي ۽ نه ئي ان جو جمهوريت سان ڪو تعلق آهي. هن چيو ته قانون کان ڪير مٿانهون نه آهي، عمران خان کي پنهنجي اعمالن ۽ ڏوهن جو حساب ڏسڻو پوندو، هو فارن فنڊنگ جو ڏوهاري آهي، سمورا ثبوت اليڪشن ڪميشن جي فيصلي ۾ موجود آهن. هن چيو ته عمران خان اوورسيز پاڪستانين کي به دوکو ڏنو، انهن کان خيرات جي نالي تي پئسا وٺي سياسي مقصدن جي لاءِ استعمال ڪيا. اطلاعات واري وفاقي وزير چيو ته ڪير ان جو آله ڪار بڻجڻ جي ڪوشش نه ڪري، اهي ملڪ دشمني ڪري رهيا آهن جنهن جي آئين اجازت نه ٿو ڏي. هن چيو ته هي شخص نوجوان ٻارن کي بغاوت تي اتساهي رهيو آهي، انهن کي دوکو ڏي ٿو، نوجوان اهڙي قسم جي حڪمن تي عمل نه ڪن. هن چيو ته پاڪستان جي عوام ان شخص کان حساب وٺي رهندي. هڪ سوال جي جواب ۾ اطلاعات واري وفاقي وزير چيو ته جڏهن چور پڪڙيو وڃي ٿو ته هو چور چور جو نعرو لڳائي ٿو، جڏهن فارن ايجنٽ پڪڙيو وڃي ٿو ته هو ٻين تي الزام هڻي ٿو. هن چيو ته عمران خان پنهنجي اقتدار کي بچائڻ جي لاءِ سازش جو بيانيو اختيار ڪيو، نيشنل سيڪيورٽي ڪميٽي جي اجلاس ۾ چيو ويو ته ڪنهن به قسم جي سازش ناهي ٿي، عمران خان ان وقت وزيراعظم هو، جيڪڏهن سازش ٿي هئي ته هو چونڊون ڪرائي ها. هن چيو ته اصل سازش عمران خان ممنوعه فنڊنگ گهرائي ملڪ جي خلاف ڪئي جيڪا پڪڙي وئي. هن چيو ته عمران خان جي ترجمان جولکيل ٽرانسڪرپٽ پڙهندي پڪڙيو ويو آهي. اڄ هو ان خوف ۾ ورتل آهي ته انهن سمورين ڳالهين جو جواب کيس ڏيڻو آهي. هن چيو ته اسان عوام کي هڪ هڪ شيءَ ٻڌائينداسين ته ڪهڙي طرح سازشي منصوبو تيار ٿيو. هڪ ٻئي سوال جي جواب ۾ هن چيو ته سپريم ڪورٽ جي حڪمن جي روشني ۾ حڪومت ڪنهن به چينل کي بند ڪرڻ جي ڊائريڪشن نه ٿي ڏئي سگهي. پيمرا هڪ آزاد ۽ خودمختيار ادارو آهي، ان اي آر وائي کي پيمرا آرڊيننس ۽ پيمرا رولز جي خلاف ورزي تي شوڪاز نوٽيس جاري ڪيو. پيمرا جي شوڪاز نوٽيس ۾ آرٽيڪل 19 جي خلاف ورزي جو واضح طور تي ذڪر آهي ۽ چيو ويو آهي ته پيمرا آرڊيننس ۽ پيمرا رولز جي خلاف ورزي ٿي آهي. هن چيو ته اهڙو مواد جيڪو رياستي ادارن، پاڪ فوج، دفاع جي ادارن، سويلين بيوروڪريسي، پاڪستان حڪومت جي اندر ورڇ ۽ رينڪ اينڊ فائل جي اندر بغاوت جي ڪال ڏئي رهيو هجي، ان جي اجازت نه ٿي ڏئي سگهجي، هي اهي ريد لائينز آهن جيڪي ڪراس نه ٿيون ڪري سگهجن، ان تحت ايڪشن ورتو آهي. هڪ ٻئي سوال تي هن چيو ته عمران خان چار سالن تائين حڪومت ۾ هو، ان جي دور ۾ شهباز شريف کي ٻه ڀيرا گرفتار ڪيو ويو، هو نيشنل ڪرائم ايجنسي برطانيا ۾ ڪيس کڻي ويو پر هڪ الزام به ثابت نه ڪري سگهيو. هن چيو ته هي پاڻ چور آهي، پاڻ فارن ايجنٽ آهي، فارن ايڊڊ پارٽي جو چيئرمين آهي، عوام کي وڌيڪ بيوقوف نه ٿو بڻائي سگهجي. هڪ ٻئي سوال تي هن چيو ته اسان جو اڄ به اهو ئي موقف آهي ته ادارن جي اندر موجود ماڻهن کي آئين جي خلاف ورزي جي اجازت نه آهي، اهو ئي مسلم ليگ (ن) ۽ نواز شريف جو موقف آهي ۽ اهو ئي پاڪستان مسلم ليگ (ن) جي سياست جو محور آهي. هن چيو ته اسان عوام جي خدمت تي يقين رکون ٿا. هن چيو ته نواز شريف جو نظريو آهي ته ادارا آئيني حدن ۾ رهي ڪم ڪن. هڪ ٻئي سوال تي هن چيو ته قانون پنهنجو ڪم ڪري رهيو آهي، ملڪ جي خلاف بغاوت، چوري، عوام جو پئسو ڦريندڙ قانون جي پڪڙ ۾ ايندا.
