اسلام آباد۔27اکتوبر(اے پی پی)ترجمان دفتر خارجہ آکھیے جو جموں و کشمیر اچ بھارتی افواج دے غاصبانہ قبضہ دے 77 سال مکمل تھیوݨ تے پاکستان دی حکومت اتے عوام کشمیری عوام نال یکجہتی کریندی اے، اڄ دے ݙینھ پاکستان دے صدر، وزیر اعظم اتے نائب وزیر اعظم و وزیر خارجہ کشمیری عوام دے حق خودارادیت کیتے کشمیری عوام دی اخلاقی، سیاسی و سفارتی حمایت جاری رکھݨ دا عزم دوہرائے، نائب وزیر اعظم و وزیر خارجہ اقوام متحدہ اتے اسلامی تعاون تنظیم (او آئی سی)دی قیادت کوں خط لکھین جیندے اچ غیر قانونی طور تے مقبوضہ جموں و کشمیر دی موجودہ صورتحال اڳونہی کریندے، اقوام متحدہ دی سلامتی کونسل دی متعلقہ قرارداداں تے مکمل عمل درآمد دا مطالبہ کیتے اتے انسانی حقوق دی خلاف ورزیاں روکݨ تے زور ݙتے تاں جو کشمیری سیاسی قیدی اتے مخالفین رہا تھیون۔
ایویں ہی سیکرٹری خارجہ اسلام آباد اچ سفارتی مشناں کوں جموں و کشمیر تنازعہ دے کثیر الجہت قانونی، سلامتی و انسانی حقوق بارے ݙسائے۔ اڄ سویلے کشمیریاں نال یکجہتی کیتے اسلام آباد اچ کانسٹی ٹیوشن ایونیو توں ڈی چوک تئیں یکجہتی واک کیتی ڳئی جیندی اڳواݨی وفاقی وزیر امور کشمیر و گلگت بلتستان انجینئر امیر مقام اتے پارلیمانی سیکرٹری برائے امور خارجہ ڈاکٹر شجرہ منصب علی خان کھرل کیتی۔
پورے ملک اچ کشمیریاں دی جدوجہد کوں خراج تحسین پیش کرݨ کیتے عوامی ریلیاں، سیمینارز اتے تصویری نمائشاں سودھا تقریبات تھئین۔ اوورسیز پاکستانیاں وی کشمیریاں نال یکجہتی ݙکھائی اتے تقریبات کیتن۔ پورے جڳ اچ پاکستانی سفارتی مشناں وی ایں سانڳے مختلف تقریباں، واک اتے ریلیاں کرائن۔
