مظفر آباد – 14 – ڊسمبر (اي پي پي) نگران وزيراعظم انوارالحق ڪاڪڙ ڪشميرين جي آزادي جي تحريڪ جي مڪمل حمايت جو ورجاءُ ڪندي چيو آهي ته ڪشمير پاڪستان جي شهه رڳ آهي، ڀارتي سپريم ڪورٽ زميني حقيقتن کي نظرانداز ڪندي ڪشمير تي سياسي ارادن تي ٻڌل غيرقانوني ۽ غيرمنصفاڻو فيصلو ڏنو آهي، جيڪو ڪجهه والاريل ڄمون ۽ ڪشمير ۾ ٿي رهيو آهي پاڪستان ان کان لاتعلق نه ٿو رهي سگهي، ڪشميرين کي طاقت جي زور تي زير ڪرڻ جو ڀارتي خواب ڪڏهن پورو نه ٿيندو، دنيا کي ٻڌائڻ چاهيون ٿا ته اسان پنهنجي مفاد ۽ سالميت تي ڪو ٺاهه نه ڪنداسين. پاڪستان تي ڪشمير جي ڪري ٽي جنگيون مڙهيون ويون، جيڪڏهن 300 ڀيرا به جنگ مڙهي وئي ته اسان اها جنگ وڙهنداسين، ڪنهن جي ذهن ۾ ڪنهن به قسم جو ڪو خدشو آهي ته اهو ختم ڪري ڇڏي. اهڙن خيالن جو اظهار هن آزاد ڄمون ۽ ڪشمير قانونساز اسيمبلي کي خطاب ڪندي ڪيو. نگران وزيراعظم چيو ته ايوان ۾ گهرائڻ تي ٿورا ادا ڪريان ٿو، پهريون نگران وزيراعظم آهيان جنهن کي آزاد ڪشمير جي قانونساز اسيمبلي ۾ خطاب جي دعوت ڏني وئي، هڪ سال جي مختصر عرصي ۾ ٽيون پاڪستاني ليڊر آهيان جنهن کي آزاد ڄمون ۽ ڪشمير قانونساز اسيمبلي کي خطاب جو موقعو ملي رهيو آهي، ان سان آزاد ڄمون ۽ ڪشمير جي عوام ۽ قيادت سان مضبوط وابستگي جي عڪاسي ٿئي ٿي. هن چيو ته ڪشميري عوام بي پناهه خوبين جي مالڪ آهي، ان ڏکڻ ايشيا ۾ مختلف شعبن ۾ شاندار خدمتون سرانجام ڏنيون آهن، ان سان گڏوگڏ هن ظلم ۽ ڏاڍ کي به منهن ڏنو آهي، سرحد پار لکين ڪشميري عوام پنهنجي جائز خواهشن جي تڪميل جي لاءِ ناجائز قبضي کان ڇوٽڪاري جي لاءِ ڪوششون ڪري رهيا آهن، علامه اقبال به پنهنجي شاعري ۾ ڪشميرين جي خراب حالت کي بيان ڪيو آهي. هن چيو ته ڪشمير مسئلو گڏيل قومن ۾ گذريل 7 ڏهاڪن کان حل طلب آهي ۽ اهو 1948ع کان گڏيل قومن جي سلامتي ڪائونسل جي ايجنڊا تي آهي، گڏيل قومن جي سلامتي ڪائونسل جي قراردادن ۾ والايرل ڪشمير جي عوام جي خودمختياري جي حق کي تسليم ڪيو ويو آهي پر افسوس جي ڳالهه آهي ته 7 ڏهاڪن کان وڌيڪ گذرڻ جي باوجود انهن قراردادن تي عملدرآمد نه ٿي سگهيو ۽ ان جي بدران ڀارت جي موجوده حڪومت والاريل ڪشمير تي پنهنجي قبضي کي مضبوط بڻائڻ جي لاءِ عالمي سطح تي مڃيل ان تڪراري علائقي ۾ قانونسازي ۽ ڪيترائي انتظامي قدم کنيا آهن. هن چيو ته اهو ڀارت ئي هو جيڪو ڄمون ۽ ڪشمير جو تڪرار گڏيل قومن ۾ کڻي ويو هو ۽ ان وقت جي ڀارت جي وزيراعظم پنڊت جواهر لعل نهرو ڪيترن ئي موقعن تي پنهنجي مرضي سان ڪشميري عوام کي ريفرنڊم جو حق ڏيڻ جي خاطري ڪرائي، ان کانپوءِ به ايندڙ ڀارتي حڪومتون ڄمون ۽ ڪشمير کي تڪراري علائقو تسليم ڪيو آهي، موجوده ڀارتي حڪومت انهن واعدن تان ڪيئن پٺتي هٽي سگهي ٿي، ڀارت کي گڏيل قومن، پاڪستان ۽ سڀ کان وڌيڪ ڪشميري عوام جي ريفرنڊم جي واعدن کي پورو ڪرڻ گهرجي. هن چيو ته گڏيل قومن جي سلامتي ڪائونسل جون قراردادون اڃا تائين موجود آهن ۽ وقت گذرڻ سان انهن جي اهميت گهٽ ناهي ٿي. نگران وزيراعظم چيو ته غيرملڪي قبضي جي خلاف ڪشميرين جي جدوجهد جي هن نازڪ موقعي تي پاڪستان پاران هو اڻٿڪ حمايت جو ورجاءُ ڪن ٿا. نگران وزيراعظم چيو ته هو ڪشميرين سان سنگين ناانصافي جي خلاف يڪجهتي جي اظهار لاءِ هتي آيو آهي، والاريل ڪشمير ۾ ڪشميرين تي ڀارتي ظلم ۽ ڏاڍ جاري آهي، ٽي ڏينهن اڳ ڀارتي سپريم ڪورٽ زميني حقيقتن کي نظرانداز ڪندي ڪشمير تي سياسي ارادن تي ٻڌل غيرقانوني ۽ غيرمنصفاڻو فيصلو ڏنو آهي ۽ ڀارتي حڪومت 5 آگسٽ 2019ع جي غيرقانوني ۽ هڪطرفي قدم کي جائز قرار ڏنو آهي، اهو غيرمنصفاڻو فيصلو سڀ کان وڏي نام نهاد جمهوريت جي سپريم ڪورٽ ڏنو آهي. هن چيو ته ڀارت جي منظم انداز ۾ اقليتن کي نشانو بڻايو پيو وڃي، رياستي سرپرستي ۾ فوتگين ۽ دهشتگردي جو سلسلو جاري آهي ۽ دنيا جي اها نام نهاد جمهوريت ڪشميري عوام کي پنهنجي مرضي سان فيصلو ڪرڻ جي لاءِ ريفرنڊم جو حق ڏيڻ کان خوفزده آهي. هن چيو ته ڀارت جو 5 آگسٽ 2019ع جو غيرقانوني ۽ هڪطرفو قدم ۽ ان کانپوءِ کنيل قدمن جو مقصد والاريل ڪشمير ۾ آبادي جو تناسب ۽ سياسي جاگرافيائي تبديل ڪرڻ آهي، اهي قدم عالمي قانون ۽ ڄمون ۽ ڪشمير بابت گڏيل قومن جي سلامتي ڪائونسل جي قراردادن ۽ چوٿين جنيوا ڪنوينشن جي واضح خلاف ورزي آهن ۽ ڀارت ڪشميرين کي انهن جي پنهنجي سرزمين کان محروم ڪرڻ چاهي ٿو، ڀارت پاڻ اهو تسليم ڪري چڪو آهي ته والاريل ڪشمير جي حيثيت جو تعين جمهوري طريقي سان گڏيل قومن جي انتظام تحت آزاداني ۽ غيرجانبداراڻي ريفرنڊم جي ذريعي ڪشميري عوام پنهنجي مرضي سان پاڻ ڪندي. هن چيو ته انتظامي قدمن ۽ عدالتي فيصلن سان ڀارت گڏيل قومن جي سلامتي ڪائونسل جي قراردادن موجب پنهنجي ذميوارين کان آجو نٿو ٿي سگهي، هڪ طرف ڀارت گڏيل قومن جي سلامتي ڪائونسل جو مستقل ميمبر بڻجڻ جو خواهشمند آهي، ٻئي طرف عالمي قانون ۽ گڏيل قومن جي سلامتي ڪائونسل جي قراردادن جي خلاف ورزي ڪري رهيو آهي ۽ ان سان هندوتوا نظريي جو پتو پوي ٿو. هن چيو ته گڏيل قومن موجب ڄمون ۽ ڪشمير جو مسئلو رڳو ڪشميرين جي ريفرنڊم سان حل ٿيندو، ڀارتي سپريم ڪورٽ جو فيصلو ڪشمير تي پنهنجي قبضي کي ڊيگهه ڏيڻ جي لاءِ آهي، ڪشميرين ڀارتي قدمن کي رد ڪري ڇڏيو آهي، ڪشميرين کي طاقت جي زور تي زير ڪرڻ جو ڀارتي خواب ڪڏهن پورو نه ٿيندو. هن چيو ته پاڪستان ڪشميرين جي آزادي جي تحريڪ جي مڪمل حمايت ڪري ٿو، ڀارتي فوج جي پيلٽ گنز جي استعمال سان لکين ڪشميرين جون اکيون ضايع ٿي چڪيون آهن، هزايرن ڪشميرين کي شهيد ڪيو ويو آهي ۽ هزارين گم ڪيا ويا آهن، عورتن جي بي حرمتي ڪئي پئي وڃي ۽ گڏيل قومن جي رپورٽس ۾ به انساني حقن جي خلاف ورزين کي بيان ڪيو ويو آهي. هن چيو ته والاريل ڪشمير ۾ شهادتن ۽ ڪشميري اڳواڻن کي غيرقانوني طور تي حراست ۾ رکڻ ۽ بنيادي ڍانچي کي تباهه ڪرڻ جي باوجود ڀارت ڪشميرين جي آزادي جي جذبي کي دٻائي نه ٿو سگهي، دنيا کي پنهنجو ڪردار ادا ڪندي ڪشمير مسئلي جي حل لاءِ ڪوشش ڪرڻي پوندي، ڪيستائين ڪشميرين جي آواز کي دٻائبو رهبو، ڪيستائين ڀارت جي رياستي دهشتگردي جاري رهندي؟. هن چيو ته ڀارت ڪشميري ليڊر سيد علي گيلاني جي لاڏاڻي کانپوءِ به ان کان خوفزده رهيو آهي، ڪجهه مهينا اڳ حريت اڳواڻ ياسين ملڪ کي موت جي سزا ٻڌائي وئي، اهڙيون سزائون رڳو ڪٺ پتلي عدالتون ئي ٻڌائي سگهن ٿيون، خوف ۽ ڏاڍ جي فضا ۾ ترقي ۽ خوشحالي ڪيئن ممڪن ٿي سگهي ٿي. نگران وزيراعظم چيو ته ڪشمير پاڪستان جي شهه رڳ آهي، اسان ڪشمير مسئلي جي منصفاڻي حل جي لاءِ پنهنجو ڪردار ادا ڪندا رهنداسين، ڪشمير مسئلي جي حل لاءِ پاڪستاني ليڊرشپ ڪشميري قيادت سان گڏ بيٺل آهي، اسان ڪيترائي ڀيرا ڪشمير مسئلي سميت سمورن معاملن کي افهام تفهيم سان حل ڪرڻ جي ڪوشش ڪئي، ڀارت سدائين هٺ ڌرمي جو مظاهرو ڪيو. هن چيو ته آزاد ڪشمير ۽ گلگت بلتستان بابت ڀارتي سياسي اڳواڻ زهر اوڳاڇيندا رهندا آهن، دنيا کي ٻڌائڻ چاهيون ٿا ته اسان پنهنجي مفاد ۽ سالميت تي ڪو ٺاهه نه ڪنداسين، ڀارت ڪڏهن به آزاد مبصرن ۽ عالمي ميڊيا کي والاريل ڪشمير تائين پهچ نه ڏني. هن چيو ته پاڪستان ڪشميرين جي سياسي، اخلاقي ۽ سفارتي حمايت جاري رکندو، ڪشمير مسئلي جي حل کانسواءِ تڪميل پاڪستان ممڪن نه آهي، اهو منهنجي پنهنجي زمين، پنهنجي ماڻهن جو ڪيس آهي، پاڪستان ڪشمير مسئلي جو وڪيل آهي. هن چيو ته والاريل ڪشمير ۾ جيڪي قربانيون ڪشميرين ڏنيون آهن انهن کي وساري نٿو سگهجي، اسان سڀ توهان جا مقروض آهيون، برهان واني سميت ڪشميرين جون شهادتون آزادي جي ضامن آهن. هن ڇيو ته اسان جو مقابلو هندوتوا سان آهي، هندو مذهب کان اسان کي ڪو مسئلو نه آهي، پاڪستان ۾ هندو برادري پاڪستان جي ترقي ۾ اهم ڪردار ادا ڪري رهي آهي، ڀارت ۾ اقليتن سان اڻوڻندڙ سلوڪ ٿي رهيو آهي. نگران وزيراعظم چيو ته پاڪستان تي ڪشمير جي ڪري ٽي جنگيون مڙهيون ويون، جيڪڏهن 300 ڀيرا به جنگ مڙهي وئي ته اسان اها جنگ وڙهنداسين، ڪنهن جي ذهن ۾ ڪنهن قسم جو ڪو خدشو آهي ته اهو ختم ڪري ڇڏي. هن چيو ته ڪشميري سياسي اڳواڻن جي تجويزن کي ڀليڪار چونداسين.
