اسلام آباد۔24نومبر(اے پی پی) نگران وفاقی وزیر داخلہ سرفراز احمد بگٹی آکھیے پاکستانی عوام سرزمین حجاز نال ٻہوں پیار کریندن تے خادمین حرمین شریفین نال ٻہوں عقیدت رکھیندن ۔ اوامام کعبہ ڈاکٹر صالح بن عبداللہ بن حمید نال ڳالھ مہاڑ کریندے پئن جنہاں وزیر داخلہ نال انہاں دی رہائش گاہ تے ملاقات کیتی۔وزیر داخلہ امام کعبہ دا پر تپاک خیر مقدم کریندے ہوئیں آکھیے تساݙی میݙے گھر آمد میݙی خوش قسمتی اتے پورے خاندان سانڳے سعادت دی ڳالھ اے ۔انہاں آکھیے پاک سعودی تعلقات سانجھے عقیدے، تاریخ اتے عوامی رابطے تے محیط ہن ، پاکستان سعودی عرب نال بھرپی آلے تعلقات کوں قدر دی نگاہ نال ݙیکھدے ۔ امام کعبہ آکھیے مسلمان عقیدہ توحید تے کامل یقین رکھیندن ، معمولی اختلافات کوں نفاق دا باعث نی بݨݨ ݙیوݨا چاہیدا ، امت وچال اتحاد کوں ودھاوݨ دی لوڑھ اے ، امت مسلمہ کوں پیش آندے مسئلیں دی وݙی وجہ فرقہ واریت اتے غیر ضروری اختلافات ہن، ھک ݙوجھے دی صلاح دا احترام کرݨ تے سانجھی ہم آہنگی کوں ودھارا ݙیوݨا ہوسی ھک ݙوجھے دے دل جتون نہ جو آپݨی ڳالھ مسلط کروں ۔وزیر داخلہ امام کعبہ دے اعزاز اچ ناشتے دا اہتمام وی کیتا۔
