اسلام آباد۔7جون (اے پی پی):وفاقی وزیر اطلاعات و نشریات مریم اورنگزیب آکھیے جو وزیراعظم شہباز شریف دی صدارت اچ وفاقی کابینہ اجلاس اچ لوڈ شیڈنگ گھٹ کرݨ دے طریقیں تے توانائی دی صورتحال تے بریفنگ ݙتی ڳئی ، بجلی دی ودھ طلب کوں پورا کرݨ کیتے نصب شدہ صلاحیت دی کمی اے، سپلائی چین اچ وی گیپ اے کیوں جو پی ٹی آئی ایندھن دے ٻہوں سارے معاہدے نی کیتے ، اساں انہاں مسئلیں کوں وختی حل کریندے پیوں ۔ آپݨے ٹویٹس اچ انہاں آکھیے جو پی ٹی آئی انہاں سارے منصوبیں کوں چار سالاں اچ نی چلاسڳی جیڑھے جو پی ایم ایل این شروع کیتے ہن، انہاں آکھیے جو تریموں اچ سیمنز دا ایل این جی پلانٹ دنیا اچ ساریں توں زیادہ 61.6 فیصد کارآمد پلانٹ اے اتے اتھاں 2018ء اچ مسلم لیگ (ن) دے دور اچ پہلی ٹربائن آ چکی ہئی ، اے پلانٹ حالی نی چل سڳیا ، انہاں مزید ݙسائے جو قومی سطح تے وزارت توانائی دی طرفوں انرجی کنزرویشن پلان ایں اوکھے ویلھے پیش کیتا ویندا پئے جݙاں بجلی دی قلت اے اتے تیل و گیس دیاں قیمتاں عالمی منڈی اچ اتے ہن ۔ انہاں آکھیے فنانس ڈویژن دی طرفوں کابینہ اچ کفایت شعاری دا منصوبہ پیش کیتا ویندا پئے ۔ کابینہ ارکان سودھے سرکاری عہدیداران دے پٹرول استحقاق کوں 40 فیصد گھٹایا ویندا پئے۔
