اسلام آباد – 11– اپريل (اي پي پي) پرڏيهي وزير بلاول ڀٽو زرداري سان پاڪستان ۾ ايران جي سفير سيد محمد علي حسيني الوداعي ملاقات ڪئي. پرڏيهي آفيس موجب پرڏيهي وزارت اسلام آباد ۾ ٿيندڙ ملاقات ۾ پاڪستان ۽ ايران جي وچ ۾ ٻطرفن لاڳاپن تي خيالن جي ڏي وٺ ٿي. ان موقعي تي پرڏيهي وزير بلاول ڀٽو زرداري چيو ته پاڪستان ايران سان سمورن شعبن ۾ پنهنجي لاڳاپن کي انتهائي اهميت ڏي ٿو. هن چيو ته ايران سعودي عرب سفارتي لاڳاپن جي بحالي خطي جي امن لاءِ انتهائي اهم آهي. پرڏيهي وزير پاڪستان ۾ مقرري دوران پاڪ ايران لاڳاپن جي حوالي سان سيد محمد علي حسيني جي خدمتن کي ساراهيو.
