اسلام آباد۔13اکتوبر(اے پی پی) وزارت ماحولیاتی تبدیلی دی طرفوں قومی اسمبلی کوں آکھیا ڳئے جو نویں جنگلات رہاوݨ تے شجرکاری دے حوالے نال پالیسی سازی اچ عوامی نمائندیں دی شرکت توں مثبت اثرات پئے سڳدن ،سیلاب توں پہلے شجرکاری، شہراں کوں پلاسٹک توں پاک کرݨ تے دریاواں اچ آلودگی مکاوݨ کیتے جیڑھی منصوبہ بندی کیتی ڳئی ہئی مگر قدرتی آفت دے بعد ایں سلسلے اچ فنڈز دی فراہمی اچ مشکلات درپیش ہن۔ قومی اسمبلی اچ سوالاں دے وقفے ویلھے طاہرہ اورنگزیب دے سوال دا جواب ݙیندے ہوئیں وفاقی وزیرو سینیٹر شیری رحمان آکھیے جو شجرکاری اچ سیاسی لوکاں دی شرکت توں فیدہ تھی سڳدے ، ایں معاملے اچ سول سوسائٹی تے عوام دی شرکت توں بہتری آسڳدی اے ، حالی وی وݨ کپیندے پئن ، اساں چیف سیکرٹری پنجاب دے ذریعے ھک فیکٹری لاوݨ کیتے جنگلات دے محفوظ ذخیرے دا کٹائو رکوائے۔ میر منور تالپور دے ضمنی سوال دا جواب ݙیندے ہوئیں وفاقی وزیر شیری رحمان آکھیے جو دریائے سندھ دے کنارے وݨ کپݨ دے اساں مداخلت نی کرسڳدے ۔ محکمہ جنگلات سندھ توں اعداد و شمار گھن تے اساں ݙسا سڳدوں ۔ سیلاب توں پہلے اساں جنگلات رہاوݨ کیتے پالیسی شروع کیتی ہئی ۔ ایندے وچ شہراں کوں پلاسٹک توں پاک کرݨ تے دریاواں اچ آلودگی مکاوݨ دے پروگرام وی شامل ہن مگر سیلاب دے بعد ہݨ فنڈز اچ اوکھ تھیندی پئی اے ۔ نزہت پٹھاݨ دے ضمنی سوال دا جواب ݙیندے ہوئیں شیری رحمان آکھیے جو کوئی وی رکن اے سمجھدے جو موسمیاتی تبدیلیاں دے حوالے نال پالیسی سازی اچ منتخب نمائندیں کوں رلایا نی ویندا تاں ایں ڳالھ تے یقین رکھیندی ہاں جو ارکان قومی و صوبائی اسمبلی کوں پالیسی سازی اچ رلاوݨاں چاہیدے ۔ غلام علی تالپور دے سوال دے ولدے اچ وفاقی وزیرآکھیے وفاقی حکومت دا جیڑھا کم اے او کریندے پیوں ۔ مرکز تے صوبے آپت اچ تعاون کرسڳدن ۔
