اسلام آباد۔16ستمبر (اے پی پی) وزیر دفاع خواجہ محمد آصف آکھیا جو پارلیمنٹ عوامی امنگاں دا ترجمان اے، آئینی حدود دے اندر رہندیں ہوئیں اینکوں طاقت ور ٻݨاوݨ چاہندوں۔ مجوزہ آئینی ترامیم دا ماخذ میثاق جمہوریت دی دستاویز اے، انہاں ترامیم کوں پورے اتفاق رائے دے بعد ایوان اچ پیش کیتا ویسی۔ سنوار کوں قومی اسمبلی اچ ڳالھ مہاڑ کریندیں ہوئیں وزیر دفاع خواجہ محمد آصف آکھیا جو اساݙی دانست اچ اے مجوزہ آئینی ترامیم کوں متوازن ٻݨاوݨ اے۔ اساں پارلیمان دی سربلندی اتے عوامی امنگاں دے ترجمان ایں ادارے کوں طاقت ور ٻݨاوݨ چاہندوں۔ آئین اساکوں ایندی موکل ݙیندے۔ مجوزہ آئینی ترمیم دا ماخذ محترمہ بینظیر بھٹو شہید اتے میاں نواز شریف وچال تھیوݨ آلا میثاق جمہوریت اے۔ ایندے اچ کوئی سیاست کائنا ہئی نہ اینکوں سیاسی رنگ ݙتا ویندا پئیا ہئی۔ انہاں ترامیم تے اتفاق تھی ڳئیا تاں انشاء اللہ او ایوان اچ وی امسی۔ انہاں آکھیا جو آئین دے آرٹیکل 63 اے اچ وی ترمیم دی تجویز اے۔ آئینی عدالت دی لوڑھ دا ذکر وی میثاق جمہوریت اچ اے۔ بہوں ملکاں اچ آئینی عدالتاں موجود ہن۔ انہاں آکھیا جو اعلیٰ عدلیہ دی بحالی دے بعد ہک سینئر جج دے مشورے نال ججاں دی تعیناتی دا طریقہ کار ٻݨایا ڳئیا ہئی۔ اساں آئین دے مطابق ایں معاملے اچ وی ایں ایوان دے کردار کوں موثر ٻݨاوݨ چاہندوں۔ آئین پارلیمنٹ کوں جو عزت تے تکریم ݙیوݨ چاہندے اساں اینکوں نافذ کرݨ چاہندوں۔ ایندے اچ کوئی سیاسی فائدہ کائنی۔ کوئی ذی شعور بندہ یا ادارہ انہاں تجویزاں نال اختلاف نی کر سڳدا۔ (م ،ن/ج،م)15:27
