اسلام آباد۔23اگست (اے پی پی) وفاقی وزیر اطلاعات و نشریات عطاء اللہ تارڑ آکھیے جو خیبر پختونخوا اتے گلگت بلتستان دے چھل متاثرہ علاقیں اچ نیشنل ہائی وے مکمل طور تے بحال تھی چُکی اے، 60 متاثرہ فیڈرز اچوں 52 فیڈرز کم کریندے پئن، سوات ون ڈویژن اچ بجلی مکمل طور تے بحال اے، صوبائی سڑکاں تے وی کم جاری اے، رابطہ سڑکاں کوں کھولیا ویندا پئے۔ چھل متاثرہ علاقیں اچ بجلی اتے سڑکاں دی بحالی دے حوالے نال میڈیا نال ڳالھ مہاڑ کریندیں وفاقی وزیر اطلاعات آکھیے جو اڄوکے مینھ نال اربن فلڈنگ اتے کلاؤڈ برسٹ دی صورتحال اچ وزیراعظم محمد شہباز شریف دی خصوصی ہدایت تے این ڈی ایم اے مکمل طور تے فعال رہی جیڑھی صوبائی حکومتاں دے نال قریبی رابطے اچ اے۔ این ڈی ایم اے ریلیف و ریسکیو دیاں سرگرمیاں اچ بھرپور طریقے نال آپݨا کردار ادا کریندی پئی اے۔ انہاں آکھیا جو “فیلڈ مارشل سید عاصم منیر دی خصوصی ہدایت تے پاک فوج دیاں مختلف یونٹس اتے بٹالینز کوں چھل متاثرہ علاقیں اچ بھیجیا ڳیا، اے ہک نیشنل رسپانس اے۔ وزیراعظم جݙاں بونیر دے دورے تے ڳئے تاں فیلڈ مارشل سید عاصم منیر وی اتھاں موجود ہن۔ وزیراعظم گزریل ݙینھ ہک اجلاس دی صدارت کیتی جیں اچ ساریاں سرگرمیاں دی تفصیل ڳھدی ۔انہاں آکھیا جو وزیراعظم دی خصوصی ہدایت تے وفاقی وزیر توانائی سردار اویس لغاری سوات اچ موجود رہیے، ایں ویلھے سوات ون ڈویژن اچ بجلی مکمل طور تے بحال تھی چُکی اے، سارے فیڈرز آن لائن ہن، پیر بابا اچ 90 فیصد، ملک پور اچ 90 فیصد، گوکنڈ اچ 95 فیصد جݙاں جو تحصیل پورن اچ 87 فیصد بجلی بحال تھی چُکی اے۔ انہاں آکھیا جو “سوات، شانگلہ، بونیر اتے صوابی دے 60 اچوں 52 فیڈرز آن لائن تھی چُکن۔” بجلی دی مکمل بحالی کیتے باقی 8 فیڈرز تے کم جاری اے اتے انشاء اللہ جلدی 100 فیصد بجلی بحال تھیسی ۔ وفاقی وزیر آکھیا جو وفاقی حکومت بحالی دیاں سرگرمیاں تے پوری طرح عمل کریندی پئی اے، بجلی دی بحالی کیتے وفاقی وزیر توانائی اویس لغاری اتے انہاں دی ٹیم دیاں کوششاں قابل تعریف ہن۔ وفاقی وزیر ݙسایا جو سڑکاں دے حوالے نال کے کے ایچ، خوازہ خیلہ روڈ (این-90) اتے استک برج جگلوٹ–سکردو روڈ مکمل طور تے کھل چُکن۔ نیشنل ہائی وے تے کوئی رکاوٹ موجود کائنی ۔ وفاقی حکومت خیبر پختونخوا دے سی اینڈ ݙبلیو ڈیپارٹمنٹ دے نال رل تے صوبائی سڑکاں تے وی کم شروع کر ݙتا اے۔ اضافی مشینری اوتھاں موجود اے اتے رابطہ سڑکاں کوں کھولیا ویندا پئے۔ انہاں آکھیا جو وزیراعظم وزیر مواصلات عبدالعلیم خان کوں خصوصی طور تے گلگت بھیجیا۔ سیکریٹری مواصلات اتے چیئرمین این ایچ اے وی خیبر پختونخوا اچ موجود رہیے۔ ایف ڈبلیو او وی سڑکاں دی بحالی دے آپریشنز اچ شامل اے۔ وفاقی وزیر آکھیا جو “گلگت دی تحصیل گوپس اچ گزریل ݙینھ مٹی دے ڈھیرے ڈِھݨ نال ہنگامی صورتحال پیدا تھئی ہئی، اتھاں موجود سارے لوکاں کوں محفوظ جاہ تے منتقل کر ݙتا ڳیا۔ وزیراعظم چیف سیکریٹری گلگت بلتستان کوں بذریعہ ویڈیو لنک ہدایت ݙتی جو علاقے کوں محفوظ بݨایا ونڄے۔ آرمی دی انجینئرنگ کور صورتحال دا جائزہ گھندی پئی اے، ہݨ تئیں دیاں رپورٹس اطمینان بخش ہن۔ وزیراعظم دا خصوصی سیل ایں دی مانیٹرنگ کریندا پئے۔ انہاں آکھیا جو این ڈی ایم اے، صوبائی حکومت اتے پاک فوج گلگت بلتستان دے ایں متاثرہ علاقے دی مسلسل نگرانی کریندی پئی اے۔ لوکاں کوں محفوظ مقامات تے منتقل کر ݙتا ڳئے۔ انہاں آکھیا جو این ڈی ایم اے مزید مینھ دے سپیلز دے حوالے نال ارلی وارننگ وی جاری کریندی پئی اے تاں جو ویلھے سر انخلا ممکن بݨایا ونڄ سڳے۔ انہاں آکھیا جو “گنڈا سنگھ والا (دریائے ستلج) اچ وی پنجاب این ڈی ایم اے متحرک اے۔ متاثرہ علاقیں کوں وارننگز اتے آگاہی ݙتی ویندی پئی اے۔ وفاقی وزیر آکھیا جو ریلیف سرگرمیاں نیشنل رسپانس ہن، وزیراعظم صورتحال توں مکمل واقف ہن اتے ہر ویلھے ایں دی اپ ڈیٹ گھندے پئن۔
