اسلام آباد 06 اکتوبر (اے پی پی) وزیر اعظم عمران خان په يوه ورځنۍ دوره کوئټې ته رسيدلې دې، کوئټې ته په رسيدو د بلوچستان وزیراعلیٰ جام کمال د وزیر اعظم هركلے وكړو۔ د وزیر اعظم میډیا آفس لخوا جاری شوې پریس ریلیز له مخې وزیر اعظم به د خپلې دورې په مهال د بلوچستان صوبائی کابینې غړو سره ملاقات کوي۔ وزیراعظم به بلوچستان كښې د پرمختيائي پروژو په اړه د غونډې مشري هم كوي۔ وزیراعظم به کوئټه كښې د پارلماني غړو او سول سوسائټۍ نمائندګانو سره ملاقات هم كوي۔ د اطلاعات او خپرونو وفاقی وزیر ، د منصوبه بندۍ او پرمختګ وفاقی وزیر ، د كورنيو چارو دوهم وزير، د بلوچستان سیاسی قیادت او د وزیراعظم د ميډيا لپاره خاص استازې هم هغه سره ملګرې دي۔
