لاہور۔ 13 ستمبر (اے پی پی) وفاقی وزیر منصوبہ بندی، ترقی و اصلاحات، پروفیسر احسن اقبال آکھیے جو نبی اکرمؐ دی ذاتِ اقدس پوری انسانیت سانڳے مشعلِ راہ اے تے اڄ دے جدید دور اچ نوجواناں کوں درپیش فکری، سماجی تے معاشی چیلنج دا حل صرف تے صرف سیرت النبیؐ دیاں تعلیمات تے عمل کرݨ اچ اے۔انہاں اے ڳالھ ہک انٹرویو اچ آکھی، جݙاں او ہائر ایجوکیشن کمیشن آف پاکستان دے زیراہتمام نثار فاطمہ انسٹی ٹیوٹ آف سیرت اینڈ ویمن سٹڈیز اچ منعقدہ نیشنل ویمن سیرت کانفرنس اچ بطور مہمانِ خصوصی خطاب کریندے پئے ہن۔ کانفرنس اچ ڈاکٹر ضیاء الحق، ڈاکٹر سیدہ سعدیہ تے ٻئے مذہبی سکالرز، محققین، ماہرینِ تعلیم، طلباء تے خواتین دی وݙی تعداد شامل ہئی۔وفاقی وزیر اپݨے خطاب اچ آکھیا جو اسلام ساریں توں پہلے عورت کوں عزت، وقار تے تعلیم دا حق ݙّتا تے خواتین دی تعلیم تے تربیت دے بغیر کوئی معاشرہ ترقی نی کر سڳدا۔ انہاں آکھیا جو نبی اکرمؐ ہک ایجھی ریاست قائم کیتی جیڑھی عدل، مساوات، رواداری تے بھرپی تے مبنی ہئی ، جے اساں انہاں اصولاں تے عمل کریندوں تاں پاکستان کوں ہک پرامن تے خوشحال ملک بݨایا ونڄ سڳدے۔ انہاں آکھیا جو اڄ دنیا اچ ودھدی ہوئی انتہاپسندی تے تقسیم کوں مکاوݨ سانڳے برداشت تے اخوت دیاں تعلیمات کوں عام کرݨا پوسی، لیکن بدقسمتی نال ساݙے ایمان تے عمل اچ وݙی خلیج پیدا تھی ڳئی اے جیں پاروں امت مسلمہ زوال دا شکار اے۔ فلسطین تے اسرائیلی جارحیت دی مثال ݙیندے ہوئیں انہاں آکھیا جو 2 ارب مسلمان ہووݨ دے باوجود اساں بے وس ہیسے تے ایں دی اصل وجہ قرآن و سنت توں دوری اے۔
.jpg)
